A deputada do BNG pola comarca da Barbanza, Rosana Pérez, vén de presentar unha batería de iniciativas no Parlamento para reclamar á Consellería de Educación que “de maneira inmediata cubra a praza de titoría que deixou vacante no CEIP O Grupo de Ribeira”.
Segundo indicou, esta vacante é “unha mostra máis dos recortes intensivos que vén aplicado a Xunta en favor da privada”.
Rosana Pérez reclamou, en concreto, “a incorporación dun titor ou titora para o curso de 3º B, que conta con 23 alumnos e alumnas, algúns deles con necesidades específicas de atención educativa (NEAE)”.
E engadiu: “Aínda que este é o alumando máis afectado pola falta de titor, a vacante afecta ao conxunto da matrícula deste centro, no que estudan máis de 400 nenos e nenas, dos que aproximadamente o 25 % está diagnosticado con NEAE”.
Segundo explicou a deputada nacionalista, “na vez de cubrir a praza, a Consellería de Educación propuxo á dirección do centro que 3º B fose co-titorizado por outro dos mestres do colexio e que as materias lle fosen impartidas polo resto do profesorado, unha solución rexeitada pola dirección, que chegou a presentar a súa dimisión, porque restaría horas de proxectos, gardas, especialidades e outras tarefas ao resto do cadro docente, prexudicando o resto de cursos”.
A deputada do BNG subliñou, ademais, “que a Consellería non está a cumprir a legalidade, posto que a normativa establece que cada grupo de alumnos e alumnas contará cunha persoa titora que se responsabilizará da atención e do seguimento personalizado do alumnado do grupo, así como da orientación da aprendizaxe e do apoio no seu proceso educativo”.
“Cabe salientar que, aínda completo, o catálogo do centro non se adapta á realidade, xa que contempla 12 unidades de Educación Primaria cando o centro ten trece”, apuntou na súa iniciativa Rosana Pérez, que reclama ao Goberno do PP que “atenda as reivindicacións que a Asociación de Nais e País (ANPA) do CEIP O Grupo de Ribeira leva facendo desde hai tempo sen que até o de agora fosen respondidas, nunha mostra máis do desprezo, a prepotencia e falta de respecto que vén mantendo a Consellería coas comunidades educativas”.
Ademais de esixir o nomeamento inmediato dun mestre ou mestra de Educación Primaria para titorizar o curso de 3º B, Rosana Pérez demanda nas súas iniciativas que “se executen as obras de mellora urxentes neste CEIP de Ribeira”. Nomeadamente, facéndose eco tamén das reclamacións da ANPA, a deputada nacionalista reclama a reforma integral do edificio da vella comisaría de Polícía, o arranxo da cuberta do edificio anexo de Educación Infantil e o pintado exterior do edificio principal.
