Baixo o lema Ribeira ten diginidade! Por un goberno limpo, honesto e cun proxecto que mellore a vida da xente, a agrupación local do Bloque Nacionalista Galego convocou un acto público aberto para esta semana co obxectivo de permitir á cidadanía expresar o seu malestar pola moción de censura impulsada os días pasados polo grupo independente PBBI que dirixe Vicente Mariño, até o de agora no goberno, co apoio do Partido Popular. A cita será este xoves 9 de outubro ás 20.00 horas no novo Auditorio Municipal de Ribeira. Trátase dunha xornada participativa “contra as coaccións e a compra de vontades”, segundo anunciou recentemente o aínda alcalde Luís Pérez Barral, que intervirá no acto xunto coa concelleira Antía Alberte e a voceira e coordinadora do BNG a nivel autonómico, Ana Pontón.
