O Bloque Nacionalista Galego (BNG) manifestou hoxe o seu apoio ás mobilizacións que percorren as rúas de Ribeira e da comarca do Barbanza en defensa dunha sanidade pública de calidade e con atención sanitaria garantida para toda a poboación.
Durante a protesta, representantes da formación nacionalista denunciaron a “nefasta política sanitaria” do Partido Popular, que —aseguran— está a derivar cada vez máis recursos cara á sanidade privada mentres se deteriora e se recortan medios na pública.
“Esta política ten como consecuencia directa a diminución da calidade asistencial que recibe a nosa veciñanza”, indicaron desde o BNG, lembrando o incremento das listas de espera, tanto nos centros de saúde como nos hospitais, así como o colapso dos servizos de urxencias.
O BNG advertiu ademais da falta de persoal sanitario en moitos centros de saúde de Galicia, con crianzas sen pediatra asignado, a ausencia de psicólogos e un número “mínimo” de fisioterapeutas dispoñibles, o que consideran resultado dunha estratexia “orientada a deteriorar o sistema público mentres medra o negocio da sanidade privada”.
“Desde o BNG denunciamos este modelo sanitario do Partido Popular e apoiamos as mobilizacións da veciñanza en defensa da súa sanidade pública, como esta tan importante que se desenvolve hoxe en Ribeira”, afirmaron, lembrando que o acto contou coa presenza do alcalde, Luís Pérez.
A formación nacionalista asegurou que seguirá mobilizándose e demandando unha sanidade pública, gratuíta e de calidade para toda a cidadanía galega.
