Este venres 17 de outubro o Auditorio de Rianxo vai dar acollida a un novo espectáculo familiar para a rapazada: Pipo o paxaro que non sabía voar, a cargo de Trémola Teatro. Será ás 18.00 horas da man da Biblioteca Municipal de Rianxo, no espazo provisional do Auditorio. Terá unha duración de 45 minutos e está dirixido a bebés de 0 a 3 anos.
A entrada será de balde ata completar capacidade, con inscrición previa en cultura@concelloderianxo.gal indicando nome e data de nacemento do bebé, nome e teléfono da persoa acompañante. Trátase dunha proposta do programa Ler Conta Moito da Rede de Bibliotecas de Galicia.
Pipo é un paxariño que está moi triste porque non sabe voar. Mais todo muda cando chegan os seus amigos… e tamén o público, que terá un papel clave para axudarlle a descubrir se pode erguer o voo.
