Tamén formaban parte da comitiva un grupo de estudantes de Erasmus procedentes de Alemaña, Grecia, Italia, Malta e Portugal que está a coñecer Galicia.
O alcalde de Rois, Ramón Tojo, recibiu este xoves no multiúsos municipal á delegación de Xeorxia que visita o municipio dentro da segunda fase do programa de intercambio internacional promovido polo Concello.
A vintena de participantes da delegación xeorxiana chegou acompañada por estudantes do programa Erasmus procedentes de Alemaña, Grecia, Italia, Malta e Portugal, que ao longo desta semana están a coñecer diferentes puntos de Galicia.
Tras unha sesión de traballo no multiúsos de Rois, a comitiva visitou a Asociación Amipa e o Campus Tecnolóxico Cortizo, onde puideron coñecer de preto as actividades e proxectos destas entidades. A xornada da mañá completouse cunha visita ao pazo de Antequeira.
Xa pola tarde, os participantes tomaron parte nun diálogo multicultural en Urdilde, no que tiveron ocasión de degustar castañas e compartir uns momentos co grupo de pandeireteiras de Rois, nun ambiente de intercambio cultural e convivencia.
Esta actividade enmárcase nos intercambios internacionais impulsados polo Concello de Rois, que no pasado mes de xullo levaron a unha decena de mozos e mozas roisenses a Xeorxia, onde coñeceron a cultura, historia, costumes e gastronomía do país. Nesta viaxe estiveron acompañados polos membros do goberno local Victoria Quiroga e José Luis Ares.
