O Centro Social de Abanqueiro (Boiro) acolle este venres 31 de outubro unha cita coa narradora oral Leti da Taberna. Trátase do espectáculo Enredada, dirixido a público adulto, que dará comezo ás 21.00 horas (coa venda de entradas na billeteira dende unha hora antes da función).
Leticia Miraz, máis coñecida como Leti da Taberna, é unha creadora de contidos galega que moitos coñecemos a través de TikTok e, agora tamén, grazas ao seu monólogo Enredada co que está de xira por toda a xeografía galega. Leti acumula 30.600 seareiros en TikTok (con vídeos que superan as 100 mil reproducións) e 55.271 seareiros en Instagram (onde abriu canle de difusión e supera en bastantes ocasións as 300 mil reproducións), aínda que o volume de reproducións dos seus contidos é sobradamente superior ao do seu número de seguidores.
Co espectáculo Enredada Leti da Taberna trae o seu primeiro monólogo no que explora en ton irónico a nosa relación coas redes sociais e como nos inflúen no noso día a día. En galego e con perspectiva feminista, Enredada enche o escenario de luz e enerxía, provocando que a espectadora se vexa identificada coas situacións que se presentan e acabe ríndose de si mesma.
