O conselleiro de Sanidade, Antonio Gómez Caamaño, achegou este 15 de outubro, no Parlamento, información de relevancia para a cidadanía de Ribeira, crítica dende hai meses co trato que se lle está a dar dende a Xunta en materia de sanidade. Segundo fixo saber, a Xunta “está a ultimar unha reordenación dos recursos humanos de atención primaria que permitirá reforzar a cobertura en centros de saúde como o de Ribeira”.
Segundo explicou, o Servizo Galego de Saúde presentará “antes de que finalice o presente ano un documento con medidas para facer fronte ás necesidades de persoal coas que conta o primeiro nivel asistencial da sanidade pública galega”.
Durante a súa intervención, Gómez Caamaño remarcou que “pese ao déficit de profesionais, a asistencia sanitaria está plenamente garantida en Ribeira, ao tempo que agradeceu o labor dos profesionais que prestan o seu servizo nos centros da localidade”. E engadiu: “En Ribeira hai catro pediatras e os catro atenden no propio día, sen demora“, referiu a modo de exemplo o conselleiro.
O conselleiro dixo que os profesionais que remataron a súa residencia en Ribeira, o pasado mes de xullo, xa están prestando servizo no centro de saúde.
Gómez Caamaño volveu novamente a culpabilizar ao Goberno central da problemática da saúde pública en Galicia: “O Ministerio de Sanidade, que é quen conta coas competencias para paliar o déficit de facultativos do Sistema Nacional de Saúde, non está a adoptar medidas efectivas para solucionar este problema, nin contemple as propostas que lle achegan as diferentes comunidades autónomas”, sinalou, reiterando que é preciso que o Goberno “permita ampliar a idade de xubilación dos facultativos ata os 72 anos e tamén que se axilice a homologación dos títulos estranxeiros”.
Estas declaracións chocan de fronte cos argumentos esgrimidos pola Plataforma pola Sanidade Pública do Barbanza, que se mobiliza cada xoves nos centros de saúde de Ribeira e Aguiño para reclamar máis persoal e melloras urxentes. A pasada fin de semana, ademais, a plataforma mobilizou máis de 5.000 persoas para facer unha cadea humana de protesta entre o Centro de Saúde de Ribeira e o Hospital do Barbanza (cinco quilómetros de distancia). Para a plataforma, a Xunta ten a capacidade de solucionar o problema de ter vontade de facelo, “sen necesidade de buscar culpábeis”. Reclaman, co apoio do Concello saínte de Ribeira, “menos recortes e máis profesionais no ámbito da saúde galega”. En concreto, denuncian a falta de profesionais en atención primaria e os longos tempos de espera en atención especializada.
