Debido á choiva, suspendeuse este domingo o roteiro teatralizado pola localidade, actividade que levará a cabo nunha data próxima pendente de determinar
As Xornadas de Homenaxe a Valle-Inclán da Pobra celebran este outono a súa XXVII edición, organizadas polo Museo Valle-Inclán coa colaboración do Concello. A axenda arrincou o 18 de outubro coa conferencia Valle-Inclán na arte galega, a cargo de Miriam Elena Cortés, profesora da USC e membro do Grupo de Investigación Iacobus. Será no auditorio da Biblioteca a partir das 20h.
O martes 21 e o mércores 22 haberá teatro para escolares: Farsa italiana de la enamorada del rey, de Valle-Inclán, a cargo de Teatro Cachirulo (monicreques de Carmen Domech e dirección de Jorge Rey). Será o martes no CEP Pilar Maestú ás 11.30h e o mércores no CEP Salustiano Rey, ás 11.30.
O xoves 23 inaugúrase a mostra Castelao: A santificación de Valle-Inclán, comisariada por Antonio González Millán, na Casa da Cultura, ás 20h.
O venres 24 preséntase o facsímile de A miña irmá Antonia, de Valle-Inclán, con limiar de Xaquín del Valle-Inclán, epílogo de Antonio González Millán, tradución de Rocío Viéitez e fotografía de Adolfo Enríquez. Será ás 20h no Museo Valle-Inclán. Publica a Secretaría Xeral da Lingua (Xunta).
O sábado 25 celébrase a conferencia Valle-Inclán como inspiración da arte, na Biblioteca, ás 20h, a cargo de Gonzalo Sánchez Mendizábal, escultor e tratadista.
O mércores 29 conmemorarase o nacemento do escritor. Haberá unha ruada a cargo de GMT Caraveiros (dende as 12h) e unha ofrenda floral ás 12.30 no Cantón da Leña.
O xoves 30 preséntase o nº 2 da Revista Foro Galicia e Valle-Inclán, na Biblioteca ás 12h.
O domingo 2 de novembro haberá teatro na rúa: con Títeres Alakran e a peza Xan Quinto, ás 12.30.
O sábado 8 de novembro celebrarase un obradoiro de caligrafía artística con Alba Farto (na sala de iconografía contemporánea do Museo ás 11.30, para a rapazada e para adultos) e o sábado 15 de novembro representarase A miña irmá Antonia (adaptación teatral da novela de Valle a cargo de TEP, Teatro en Punto) ás 20h na Alameda, na praza da Fonte e no Elma. Dirixe Gloria Rico Galán.
Tamén se celebrarán ata novembro escolmas de textos do autor en establecementos públicos da vila.
