Desde este mércores, 8 de outubro, e ata o sábado 11 celébranse na antiga Fábrica de Sel as II Xornadas da Historia de Muro. Farano baixo o epígrafe Vivencias da Veciñanza e estarán organizadas pola Área de Cultura do Concello de Muros.
As sesións inaugúranse o mércores coa intervención de Margarita Novo, o relatorio Unha ollada dende o mar. Os bares como principais lugares de ocio dos mariñeiros de Muros, e a apertura da exposición de fotografía Veciños de Muros nos anos 50. Visión de D. A. Selgas, comisariada por Madó Santos.
O día seguinte o programa inclúe un relatorio de Santiago Llovo sobre a industria da salgadura en Muros (ás 20.00 horas) e o venres será a quenda de María Mayo que falará sobre a historia do Santuario da Virxe do Camiño, tamén ás 20.00 horas.
O sábado 11 conclúen as xornadas cunha sesión a cargo Agrupación Folclórica Ximiela, que porá o foco na indumentaria tradicional da contorna de Muros, a partir das 20.00 horas.
“Trátase dunha oportunidade de lembrar e ter moi presente o noso pasado como vila da man dos seus principais protagonistas, os veciños e veciñas de Muros”, asegurou Caridad González, concelleira de Cultura.
