O presidente do Partido Popular na provincia da Coruña, Diego Calvo, acompañado do secretario xeral, Evaristo Ben, mantivo unha reunión comarcal con alcaldes e portavoces do PP na zona do Barbanza.
Este encontro forma parte dunha rolda de reunións que a dirección provincial do partido levará a cabo nas próximas semanas por distintos puntos da provincia, co obxectivo de reforzar a presenza do PP no territorio e escoitar directamente aos representantes locais.
Durante a cita, Calvo quixo coñecer de primeira man os problemas e necesidades que afectan aos distintos concellos da comarca. Así mesmo, trasladou unha mensaxe clara: “é fundamental seguir traballando a pé de rúa con todos os veciños para afrontar con garantías os próximos comicios municipais”.
O líder provincial insistiu na importancia de fortalecer a acción política local para as eleccións que se celebrarán en menos de dous anos. Neste sentido, o Partido Popular confía en recuperar varias das alcaldías que perdeu no Barbanza e consolidar as que actualmente goberna.
Desde a dirección popular sublíñase o compromiso do partido cos municipios e a vontade de manter un contacto constante cos cargos locais para preparar unha estratexia sólida para as próximas citas electorais.
