Este venres 3 de outubro a concelleira de Educación de Ribeira, Cruz Rivadulla, a concelleira de Cultura, Antía Alberte e a responsábel do Servizo de Normalización Lingüística do concello, Alicia Padín, presentaron o comezo da programación dos sábados pola mañá para público infantil e familiar.
“Presentamos o comezo da programación dos sábados pola mañá para público infantil e familiar no Lustres Rivas” apuntou Rivadulla e engadiu que as actividades están organizadas e coordinadas por Alicia Padín.
Esta nova axenda estréase este sábado 5 con Ondamini de Mamá Cabra ás 12.00 h no Centro Cultural Lustres Rivas.
“A nosa querida Gloria de Mamá Cabra vai facer que cantemos e bailemos cos nenos e coas nenas nunha mañá de diversión e aprendizaxe, para que ao chegar á casa poidamos seguir cos cantares que aprendamos”, sinalaron.
O sábado 18 de outubro ás 12.00 h será a quenda de Nube, nube, sol de Teatro ao Cubo tamén no Centro Cultural Lustres Rivas. “Nesta obra imos bailar e cantar canda os personaxes do bosque, e divertirémonos aprendendo como o sol e a chuvia cambian o noso contorno”, sinalaron, engadindo que a obra é “moi xestual” e que os nenos e as nenas máis pequeniños que asistan tamén comprenderán moi ben o que sucede no escenario.
Pola súa banda, a concelleira de Cultura presentou dúas propostas en marcha “que xa poñemos hoxe á luz para que organicen as súas axendas”. Trátase de Retrincos, con Isabel Risco e Fran Rei o domingo, 19 de outubro ás 20.00 h no Auditorio Municipal de Ribeira.
O día 19 de outubro, domingo, ás 20.00 h no Auditorio Municipal o público de Ribeira poderá asistir á representación de Retrincos, con Isabel Risco e Fran Rei. Esta obra é para público xeral e intégrase no marco do Ano Castelao dentro do programa da Secretaría Xeral da Lingua FalaRedes. A entrada é libre e gratuíta, coa apertura de portas medio hora antes de comezar a función.
O martes, 28 de outubro ás 11.30 h será a quenda de Rolán, Orlando, Roldán transita polo reino de Galiza de Fantoches Baj, no Auditorio Municipal de Ribeira, co apoio da Deputación. É unha cita para o alumnado de 6º de Primaria e 1º de ESO. Conta a historia da serea de Sálvora e o mito de Roldán que viaxa desde Betanzos a Sálvora.
Padín salientou a confianza de veciños/as, “en que sigan gozando da programación do Concello de Ribeira que é do máis alto nivel que se pode ver hoxe en día en toda Galiza”. A normalizadora insistiu unha vez máis e sempre “na importancia da transmisión do uso do galego ás nosas crianzas”.
