A antiga sede da Confraría de Pescadores de Rianxo comezou finalmente a súa renovación e posta en valor.
O proxecto vén cun orzamento de case 70.000 euros e ten entre outros os seguintes obxectivos: a mellora das infraestruturas do local histórico garantindo eficiencia enerxética e acondicionamento para formación, innovación e participación social, ao tempo que se conserva e pon en valor o patrimonio histórico da entidade. Nun plano máis específico mellorarase a eficiencia enerxética do edificio co illamento térmico, renovación de ventás, iluminación LED e reparación do tellado e canalóns; e adecuarase o inmóbel para crear unha aula polivalente para formación e participación do sector pesqueiro e marisqueiro. Tamén se mellorará a accesibilidade e a seguridade e porase en valor o patrimonio histórico da confraría, creando un espazo expositivo permanente con documentos históricos e a historia do edificio.
Trátase dun proxecto impulsado a través do GALP Ría de Arousa e promovido pola Confraría de Rianxo.
Desenvolverase en dúas anualidades, con previsión de rematar o ano que vén.
