Este venres 10 de outubro ás 20.00 horas a Biblioteca Municipal de Boiro (Centro Social de Boiro) vai dar acollida á sesión de narracións Contos con xeito, unha actividade da contadora e escritora Bea Campos encadrada no programa Ler Conta Moito.
Narradora, actriz, escritora e directora teatral, Bea Campos leva vinte anos contando contos. Licenciada en interpretación textual forma parte das compañías Migallas Teatro e Inventi Teatro. É formadora no eido da expresión dramática, da narración oral e da literatura infantil. Tamén colaborou nun gran número de proxectos audiovisuais e durante cinco anos foi presentadora na canle de difusión de literatura infantil Kalandraka TV achegando o mundo do libro a nenos e maiores.
