O proxecto europeo “De monte a monte” realiza un encontro intercomunitario entre Galiza e Portugal en Baroña (Porto do Son) e Froxán (Lousame) o fin de semana do 25 e 26 de Ouutbro
As comunidades de montes veciñais de Baroña (Porto do Son) e Froxán (Lousame) serán escenario este fin de semana dun novo encontro do proxecto europeo Erasmus+ “De monte a monte: territorios resilientes”, no que participarán arredor de cincuenta persoas procedentes de distintos puntos de Galicia e Portugal.
A iniciativa, promovida polas entidades Fundación Montescola e Verdegaia (Galicia) e Veredas da Estrela (Serra da Estrela, Portugal), ten como obxectivo promover a formación, o intercambio e o traballo colaborativo entre comunidades rurais dos dous países, centrado na loita contra as especies exóticas invasoras e na construción de territorios máis resilientes fronte ao cambio climático, os incendios forestais e a perda de biodiversidade.
O encontro de Baroña e Froxán servirá como devolución da visita realizada polas brigadas galegas á Serra da Estrela en abril e maio deste ano. As actividades desenvolveranse o sábado 25 e o domingo 26 de outubro, combinando traballos prácticos, formación forestal e espazos de debate intercomunitario.
Programa de actividades
Sábado 25 (Baroña)
- 09:30 | Xornada de voluntariado (eliminación de rebrotes de eucalipto e acacia) e visita ao monte.
- 16:30 | Visita ao Castro de Baroña e á praia de Area Longa.
- 19:00 | Sesión de debate intercomunitario.
Domingo 26 (Froxán)
- 10:00 | Voluntariado e formación práctica en poda e manexo forestal.
As persoas participantes poderán contrastar experiencias e técnicas de control de especies invasoras, así como coñecer exemplos de xestión comunitaria do monte en Galicia e Portugal. Ademais, recibirán unha acreditación pola formación recibida ao finalizar as xornadas.
O proxecto, que se desenvolverá entre setembro de 2024 e abril de 2026, inclúe xornadas teórico-prácticas, obradoiros, palestras, inventarios de biodiversidade (bioblitz) e dous encontros intercomunitarios a cada lado da fronteira.
Sobre o programa Erasmus+
Erasmus+ é o programa europeo de educación, formación, xuventude e deporte para o período 2021-2027. Ten como finalidade mellorar o desenvolvemento persoal e profesional da cidadanía, reforzar a cohesión social e fomentar o crecemento sostible e a empregabilidade.
O proxecto “De monte a monte: territorios resilientes” enmárcase na Acción Chave 2 – Parcerías de pequena dimensión (KA2) e está financiado pola Unión Europea. As opinións expresadas son responsabilidade exclusiva das entidades participantes e non reflicten necesariamente as da Unión Europea.
