A vindeira fin de semana, sábado 25 (Baroña, Porto do Son) e domingo 26 de outubro (Froxán, Lousame), o Laboratorio Ecosocial do Barbanza organiza dúas xornadas de voluntariado para a eliminación de eucalipto no monte, seguidas dunha visita ambiental.
A actividade é aberta a todos os públicos e, ao rematar, ofrecerase xantar de albaroque ás persoas participantes.
As inscricións cómpre facelas enviando un correo a info@montescola.org ata este mércores 22 de outubro.
Trátase dunha actividade impulsada polo Laboratorio e coordinada por Montescola, entidade cunha ampla experiencia en materia de deseucaliptización e eliminación de acacias. Contarase coa colaboración da Comunidade de Montes de Baroña e da Comunidade de Montes de Froxán (Lousame).
O Laboratorio Ecosocial do Barbanza conta co apoio da Fundación Biodiversidad do MITECO e está coordinado pola Fundación RIA.
O obxectivo é fomentar a participación cidadá na restauración de ecosistemas degradados e sensibilizar sobre os impactos das plantacións de eucalipto nos montes galegos.
O Laboratorio Ecosocial do Barbanza conta co apoio da Fundación Biodiversidad do Ministerio para la Transición Ecológica y el Reto Demográfico (MITECO) no marco do Plan de Recuperación, Transformación e Resiliencia (PRTR), financiado pola Unión Europea – NextGenerationEU. Coordinado pola Fundación RIA, o Laboratorio Ecosocial do Barbanza é un proxecto dedicado a promover a transición cara á sustentabilidade ambiental e a fortalecer a resiliencia na xestión territorial dos montes do Barbanza.
