O Concello do Son organiza esta tempada a II Mostra de Teatro de Porto do Son, un ciclo escénico que traerá sete obras de gran nivel á Casa da Cultura entre outubro e novembro. As representacións celebraranse ás 21h.
A axenda comeza este sábado 18 de outubro con Vicio houbo sempre, unha peza de narración oral protagonizada por Atenea García, que recolle historias reais de mulleres maiores de 80 anos sobre o desexo, o pracer e a vida. Trátase dunha divertida proposta de narración oral para público adulto onde Atenea García reflicte historias de desexo, pracer, sexualidade… A primeira conversa naceu cunha frase: “Vicio houbo sempre, gracias a Dios!” E logo seguíronlle outras tantas onde as mulleres foron contándolle unha chea de cousas supostamente prohibidas.
O 25 de outubro será a quenda de Golpes, da compañía aAntena, centrada na historia de Pamela e a aprendizaxe dunha relación que non debía vivir. O 1 de novembro, Gallaecia Eventos presentará Cabaré Climático. O 8 de novembro, a compañía Culturaactiva achegará a obra cómica para público infantil e familiar Máis saaabor! O 15 de novembro, Talía Teatro representará Un Deus Salvaxe. O 22 de novembro, o grupo local Mimarte presentará Nais en apuros.
A clausura será o 29 de novembro coa comedia D.E.P, de Malasombra.
As obras Vicio houbo sempre, Golpes e Nais en apuros serán de entrada libre, mentres que as restantes terán un prezo de 4 euros. As entradas estarán dispoñíbeis dende o 14 de outubro na Oficina de Cultura (de luns a venres, de 8:00 a 15:00 horas) ou o mesmo día da función, só con pagamento mediante tarxeta bancaria.
