Rianxo acolle este xoves 30 de outubro unha xornada informativa de desenvolvemento e emprendemento rural sobre as axudas LEADER 2026 organizada polo GDR Deloa concibida para persoas emprendedoras, entidades e iniciativas con ganas de transformar o territorio. Desenvolverase baixo o epígrafe Voces que transforman o rural.
Contarase con promotores/as locais que compartirán as súas experiencias reais con proxectos financiados polo LEADER. Será, en palabras da organización “unha oportunidade única para inspirarnos e resolver dúbidas”. A cita está prevista para as 17.30 horas deste xoves, no Pazo de Martelo. A asistencia é de balde aínda que con prazas limitadas, polo que é preciso inscribirse a través da web de Deloa.
Máis información en deloa@deloa.es ou a través do 981 817 000.
O obxectivo é poñer en valor diferentes voces do territorio como ferramenta clave para o desenvolvemento rural. Na sesión debullaranse os detalles do proxecto Mulleres que Conta (proxecto de cooperación coa intervención de Xosé A. Touriñán) e contarase coa presenza de Cristina Pazos (propietaria de Dubraseda SL, en Noia), Fran Dosil (Atmos Hotel, de Outes) e Alicia Romero (responsábel de administración da asociación inclusiva Ambar). Haberá unha actuación musical a cargo de Amaiante (grupo de música tradicional de Rianxo). A xornada rematará cun espazo aberto e con petiscos.
