A Asociación Ambar das Persoas con Diversidade Funcional acolleu un acto conmemorativo con motivo do Día Mundial da Saúde Mental, organizado pola Asociación A Creba, no que se puxo o foco na integración da saúde emocional e psicolóxica como parte esencial da diversidade funcional e social.
O acto tivo lugar no Centro de Recursos de Ambar en Ribeira e reuniu a numerosas persoas usuarias e profesionais de ambas entidades nun espazo de apoio mutuo, visibilización e concienciación social.
O momento central da xornada foi a lectura dun manifesto, protagonizado polas persoas usuarias de A Creba, no que se destacou a necesidade urxente de mellorar o benestar emocional, facilitar o acceso a recursos de apoio psicolóxico e combater o estigma que pesa sobre as persoas con experiencias en saúde mental.
A xornada serviu para reafirmar o compromiso conxunto de impulsar vidas independentes tamén desde o coidado da saúde mental, lembrando que o benestar psicolóxico é un dereito e unha condición básica para a plena inclusión social.
Este encontro simboliza o esforzo compartido de ambas entidades por construír unha sociedade máis xusta, accesible e sensible ás diferentes realidades das persoas, rompendo barreiras e promovendo unha mirada máis humana e integradora.
