A Asociación Ambar das Persoas con Diversidade Funcional lanza a prevenda da súa 11ª edición do Calendario Solidario co fotógrafo Pichero. Baixo a temática das series de televisión, este proxecto da entidade inclusiva do Barbanza busca “visibilizar e impulsar vidas independentes en comunidade”. O calendario, realizado ca participación activa das persoas usuarias de Ambar, combina a creatividade ca inclusión. Grazas a este proxecto Ambar poderá continuar co programa de Respiro Familiar, a través do cal as persoas con diversidade funcional poden participar en actividades na comunidade, pouco habituais na súa vida diaria.
Dende xa e de maneira anticipada, Ambar activa a reserva para garantir que todas as persoas interesadas poidan adquirir o seu exemplar. Esta modalidade de prevenda está dispoñíbel a través da páxina web da asociación, por teléfono, por correo electrónico ou achegándose ao seu Centro de Recursos (Frións, Ribeira).
Ambar lanza tamén unha edición especial: as primeiras 20 reservas recibirán un agasallo artesanal elaborado nos obradoiros de Ambar como agradecemento ó seu apoio.
Vías de Reserva e Contacto:
Web: Calendario Solidario 2026 (Opción de envío a domicilio ou recollida local).
Teléfono: 981 87 44 80
Email: comunicacion@asociacionambar.org
Ambar explica que “este proxecto chega á undécima edición demostrando que a creatividade e a inclusión camiñan da man”. E engade: “Cada calendario non é só unha homenaxe ás series e ó cine, senón unha ferramenta esencial para seguir construíndo unha sociedade máis xusta e inclusiva, onde a vida independente en comunidade sexa unha realidade para todas as persoas”.
