Axentes da Policía Local e efectivos de garda do Grupo de Emerxencias e Protección Civil Municipal (GAEM) foron mobilizados este martes 21 de outubro polo CIAE 112 para asistir ás persoas implicadas nun accidente sen feridos na avenida das Carolinas, á altura da rotonda que dá acceso ao porto deportivo.
Ademais, Protección Civil de Rianxo informou dun accidente na estrada de Rianxo a Isorna (estrada provincial DP-3301) á altura do alto de Palleiro. No sinistro, rexistrado este luns 20 pola tarde, foi vertida unha cantidade importante de gasóleo, que motivou que os efectivos de Protección Civil tivesen que traballar arreo este martes 21 na limpeza do firme para evitar máis accidentes. O vertido estendeuse dende a saída de Leiro até a contorna da ponte de Catoira. Traballaron na zona, tamén, os bombeiros do Parque de Boiro e traballadores da firma de mantemento da rede viaria da Deputación. A mancha estendíase ao longo de preto de catro quilómetros.
