Mar estuda coa Confraría de Rianxo a revisión da regulación das capturas acciententais de molusco con arte de bou e un adianto da cota de sardiña
O director xeral de Pesca, Acuicultura e Innovación Tecnolóxica, Cándido Rial, mantivo esta semana un encontro de traballo co patrón maior da Confraría de Pescadores de Rianxo co obxectivo de avaliar as necesidades do sector e impulsar a actividade marítimo-pesqueira da localidade.
Durante a reunión, ambos responsables abordaron diferentes cuestións de interese para o pósito, entre elas a posible regulación das capturas accidentais de molusco mediante arte de bou, así como a posibilidade de adiantar a cota de sardiña para os meses de novembro e decembro. Esta medida permitiría garantir a continuidade do traballo dos buques que non dispoñen doutras artes de pesca durante esa época do ano.
Cándido Rial destacou a vontade da Xunta de Galicia de manter un diálogo constante coas confrarías e de escoitar as súas propostas para dar resposta ás demandas do sector e reforzar a sustentabilidade e competitividade da frota galega.
