O alcalde de Boiro, José Ramón Romero, participou na mañá deste 22 de outubro na entrega do cheque coa recadación da V Andaina Solidaria JEALSA en beneficio da organización Stop Leucemia, fíxoo xunto con Margarita Hermo, directora de Relacións Institucionais da conserveira boirense JEALSA; e Carlos Pérez, bioinformático especializado na análise de datos biolóxicos para a mellora no diagnóstico e tratamento de enfermidades oncohematolóxicas, que recolleu o cheque en representación da Fundación.
Participaron nesta edición da andaina preto dun milleiro de persoas e lográronse recadar 6.153 euros. A directora de Relacións Institucionais de JEALSA agradeceu aos colaboradores e todos os participantes: “Logramos superar a recadación dos últimos anos que vai destinada a unha fundación galega que traballa dende Santiago na investigación da leucemia”.
O alcalde, José Ramón Romero, agradeceu a implicación da organización, colaboradores e de todos os participantes “por poñer o seu gran de area nesta causa solidaria e que redunda no beneficio de todos e todas”.
A Fundación Stop Leucemia traballa na loita contra o cancro hematolóxico a través da investigación. “Este diñeiro serve para que se siga mantendo a investigación que precisa tempo e constancia e que é fundamental para que cheque ao persoal médico e redunde nos pacientes”, afirmou Carlos Pérez.
