O Concello da Pobra do Caramiñal pon en marcha, a través da Concellaría de Igualdade, unha nova edición do Obradoiro de Samaín, dirixido ao alumnado de educación infantil e primaria.
A actividade desenvolverase nas instalacións do CEIP Salustiano Rey Eiras os días 31 de outubro (Día do Ensino) e 3 de novembro, en horario de 09:00 a 14:00 horas, con posibilidade de acceso ás 10:00 horas para quen o precise.
Ademais, tamén haberá dispoñíbeis servizos de madruga e comedor.
O obxectivo da iniciativa é “favorecer a conciliación da vida laboral e familiar durante estas dúas datas non lectivas, ofrecendo ao mesmo tempo un espazo lúdico e educativo para a rapazada”, explicou a Concellaría.
O prazo para formalizar a inscrición permanecerá aberto ata o martes 28 de outubro. O trámite deberá realizarse entregando o documento correspondente a través da sede electrónica municipal, no rexistro do Concello ou directamente no departamento de Igualdade.
O importe de inscrición é de 10 euros, cun desconto de 50 % para o segundo irmán ou irmá e gratuidade a partir do terceiro.
Para máis información, as persoas interesadas pódense poñer en contacto co departamento de Igualdade a través do correo electrónico igualdade@apobra.gal ou no teléfono 981 832 764 (ext. 6).
