O Concello de Padrón, xunto cos concellos de Rois e Dodro a través do CIM Terras de Iria, organiza este martes 7 de outubro a presentación do libro Nosotras: el feminismo en la democracia, da presidenta do Consello de Estado e exvicepresidenta do Goberno, Carmen Calvo.
A súa presenza en Padrón desenvolverase no marco dunha visita institucional que incluirá:
16:30 h.- Recepción no Concello de Padrón.
16:35 h.- Sinatura no de honra.
17:00 h.- Presentación do libro no Auditorio Municipal do Concello de Padrón.
Publicado por Planeta, Nosotras propón unha crónica feminista do século XXI en clave política e social. A autora analiza os avances do feminismo en España dende a chegada da democracia e identifica os retos que seguen pendentes para garantir unha igualdade real. Considerada unha das voces feministas máis recoñecidas do país, Calvo defende a necesidade de reforzar a loita pola igualdade nun momento no que, ao seu xuízo, existe confusión arredor do propio concepto de feminismo.
A obra combina a reflexión histórica co compromiso persoal da súa autora, quen achega tamén propostas de acción concretas para combater as discriminacións de xénero. Ademais, bebe da súa experiencia vital e política, coa intención de recoñecerse en outras mulleres e de ofrecer unha mirada compartida sobre dereitos, demandas e esperanzas.
Con este acto, o Concello de Padrón reforza o seu compromiso coa igualdade de xénero e coa promoción de espazos de encontro e debate arredor das políticas feministas.
