O presidente da Deputación da Coruña, Valentín González Formoso, e o presidente da Asociación Baroña, Ovidio Manuel Queiruga, asinaron este luns 13 de outubro un convenio de colaboración con vistas a permitir a creación do Centro de Transformación Colaborativo e Alimentario Baroña, unha infraestrutura pioneira destinada a fortalecer o sector agroforestal local e promover un modelo de desenvolvemento sostíbel no rural.
O proxecto, que conta cun apoio económico de 160.000 euros da Deputación da Coruña, nace co “obxectivo de mellorar a calidade e competitividade dos produtos agroalimentarios, ofrecer formación práctica en transformación e valorización alimentaria, e fomentar a creación de emprego no territorio”.
Durante o acto de sinatura, o presidente da Deputación destacou que “o Centro de Transformación de Baroña é un exemplo de innovación rural con raíces locais: aposta pola economía circular, polos produtos de proximidade e pola sustentabilidade ambiental”. Engadiu que a iniciativa suporá “unha oportunidade real para que pequenos produtores e produtoras poidan transformar e comercializar os seus produtos sen ter que abandonar o territorio”.
Formoso subliñou tamén que o proxecto “responde á filosofía de cooperación da Deputación, que apoia a iniciativas locais con capacidade transformadora e con impacto directo na vida das persoas, no emprego e na conservación do medio natural”.
O Centro de Transformación Colaborativo e Alimentario Baroña combinará a transformación de alimentos coa formación especializada en técnicas agroalimentarias, converténdose nun espazo de innovación e aprendizaxe compartida.
A Deputación e a asociación engadiron que “as súas instalacións estarán abertas non só á comunidade de Baroña, senón tamén a pequenos produtores da comarca do Barbanza, que poderán utilizalas para elaborar conservas, marmeladas, zumes, pan, bolería ou produtos cárnicos e do mar”.
A iniciativa tamén inclúe un espazo de obradoiros formativos e redes colaborativas, co obxectivo de crear sinerxías entre produtores locais, emprendedores e colectivos sociais da zona.
O novo centro tomará como referencia a experiencia de Transformando en Brión, un proxecto de éxito apoiado tamén pola Deputación e que xa funciona no Centro Comercial Monte Balado. A alta demanda neste espazo, dedicado á transformación de produtos de horta e conservas, inspirou a creación dun modelo similar en Baroña.
