A Asociación Boirense de Empresas (ABE) pechou a nova edición da campaña Volta ao Cole e fíxoo, segundo lembra no seu balance a patronal, “cun éxito rotundo de participación”.
Segundo fai saber a entidade empresarial no seu reconto de logros, durante os 26 días de duración da iniciativa rexistráronse 3.420 tíckets de compra nos negocios asociados, unha cifra que roza o récord histórico de 3.464 tíckets acadado o pasado mes de agosto, converténdose así na segunda mellor marca dende que se puxo en marcha o programa de fidelización da ABE.
O sorteo final, celebrado o luns 6 de outubro, tivo como gañadora a Enma Ouviña Castro, quen realizou a súa compra en Congelados Digna e recibirá como premio un ordenador portátil HP.
Ademais do seu carácter promocional, a campaña tivo tamén un forte compoñente solidario: por cada tícket rexistrado, a ABE destinou 0,10 € á Cruz Vermella de Boiro. A entidade completará o importe ata acadar unha doazón total de 400 €, que se entregará nas próximas datas en bonos ABE, a moeda local da asociación. Estes bonos permitirán á Cruz Vermella adquirir material escolar nos comercios asociados, que logo será distribuído entre familias de Boiro en situación de vulnerabilidade.
O presidente da ABE, Daniel García, destacou que “esta campaña é un exemplo perfecto de como o consumo local pode xerar un impacto positivo máis alá do económico. Cada compra conta, e cada tícket suma para facer de Boiro un lugar máis solidario e con máis oportunidades para todos”.
Engadiu tamén que “o apoio e a resposta da veciñanza demostran que o comercio local segue sendo un motor de dinamización social e un punto de encontro da nosa comunidade”.
A ABE quere agradecer a implicación dos negocios participantes e de todos os clientes que rexistraron os seus tíckets, “facendo posíbel que esta edición da campaña Volta ao Cole fose finalmente un novo éxito compartido entre comercio e solidariedade”.
