A Asociación Boirense de Empresas (ABE) celebrou na tarde deste mércores 8 de outubro a entrega oficial dos premios da campaña Volta ao Cole: Cada compra suma, que pechou cun balance que a patronal cualificou de “extraordinario”. En total, rexistráronse 3.420 tíckets en só 26 días, a segunda cifra máis alta dende que se implantou o programa de fidelización da entidade, quedando a só 44 rexistros do récord histórico acadado no mes de agosto.
Daniel García (presidente ABE) entrega a doazón a Julio García Varela (presidente Cruz Vermella Boiro) e o portátil a Enma Ouviña.
O acto contou coa participación de Daniel García, presidente da ABE, e de Julio García Varela, presidente da Asemblea Local da Cruz Vermella en Boiro, quen recibiu unha doazón solidaria de 400 € en bonos ABE, que permitirán mercar material escolar nos establecementos asociados da vila.
A gañadora do sorteo final foi Enma Ouviña Castro, quen realizou a súa compra no establecemento da praza de abastos Congelados Digna. Por mercar no comercio local e rexistrar os seus tíckets na web da ABE, Enma non só contribuíu á doazón solidaria á Cruz Vermella de Boiro, senón que ademais resultou gañadora do premio final da campaña: un ordenador portátil HP, que lle foi entregado durante o acto.
Durante a campaña, que se desenvolveu entre o 10 de setembro e o 5 de outubro, cada tícket rexistrado xeraba 0,10 € de doazón para a Cruz Vermella. “O éxito da participación cidadá permitiu alcanzar unha cifra récord, e a ABE completou a cantidade final ata os 400 €”, explicou a ABE.
Esta achega permitirá á Cruz Vermella apoiar a familias con menos recursos na compra de material escolar, reforzando así a vertente solidaria da iniciativa.
Daniel García, presidente da ABE: “Estamos moi satisfeitos cos resultados desta campaña. Conseguimos mobilizar á veciñanza, reforzar o comercio local e, ademais, xerar un impacto social real. Cada tícket contou dobre: para apoiar ás nosas empresas e para axudar ás familias que máis o necesitan neste comezo de curso”.
Julio García Varela, presidente da Asemblea Local da Cruz Vermella en Boiro: “Agradecemos profundamente esta colaboración da ABE e, sobre todo, da cidadanía de Boiro. Esta doazón transformarase en material escolar para nenos e nenas da nosa contorna, facilitando que todas as familias teñan as mesmas oportunidades neste inicio de curso”.
O compromiso continúa
A ABE quixo agradecer a implicación de todos os negocios e persoas participantes que “fixeron posíbel este éxito colectivo, demostrando que o comercio local é tamén unha ferramenta de transformación social”. A entidade avanzou que seguirá “apostando por campañas con impacto económico e solidario, que reforcen os lazos da comunidade”.
