Este sábado 27 de setembro ás 19:30h, a Galería Maraca (Vigo) acollerá a presentación de Pifostio (Xerais, 2025), o máis recente libro do escritor e poeta Samuel L. París. O autor estará acompañado pola investigadora e creadora Beatriz Romero para conversar sobre esta obra singular que reúne 61 pezas literarias a medio camiño entre o relato, a crónica, a sátira e a poesía.
A cita será este sábado ás 19.30 horas na Galería Maraca.
Pifostio é un compendio de sesenta e un artefactos narrativos atravesados polo fráxil e o indómito, a violencia e a tenrura, o delirio e o cotián. Nas súas páxinas aparecen elfos, Britney Spears, Carlos Alcaraz, System of a Down, un cocido, un exame, unha Dyson ou a monarquía, entre moitos outros elementos que conviven entre a ironía, a fantasía doméstica, a crítica social e o humor.
O libro explora as tensións entre o absurdo e o real, o inesperado e o recoñecíbel, compondo un mosaico de voces e situacións que revelan tanto a desmesura como a intimidade da experiencia contemporánea.
Sobre o autor
Samuel L. París (Muros, 1984) é escritor e poeta cunha traxectoria marcada pola experimentación formal e a constante procura de novos formatos de creación. Autor de poemarios como Manual da destrución (2008), Inflamable (2012), O único e verdadeiro deus das cousas que están feita un cristo (2024) ou O tenro é o salvaxe (2025), cultivou proxectos que van dende a autoedición manuscrita ata a poesía en postais.
En 2025 publica Pifostio con Edicións Xerais, a súa primeira obra narrativa extensa, confirmando a súa versatilidade literaria. Ademais do seu traballo como escritor, foi baixista de Terbutalina e Thee Blind Crows, e actualmente dirixe o programa mensual de poesía A Catapulta, emitido en directo en colaboración con El Salto.
