O secretario xeral da Emigración, Antonio Rodríguez Miranda, mantivo hoxe un emotivo encontro en Padrón con Lorena Evangelina García Zaragoza, unha das beneficiarias das axudas extraordinarias ao retorno da Xunta de Galicia. Lorena regresou recentemente desde A Arxentina acompañada do seu marido, dous fillos, un sobriño e o seu pai, coa intención de reintegrarse plenamente na sociedade galega.
Durante o acto, Miranda destacou que esta familia representa “o efecto tractor” destas axudas, que favorecen o retorno conxunto de varias xeracións e a súa integración plena no país. Subliñou tamén que estas axudas non son só unha cifra orzamentaria, senón “a chave para iniciar unha nova vida con seguridade e dignidade” en Galicia.
As axudas permiten cubrir os primeiros gastos de instalación, axudan nos trámites administrativos iniciais e serven como base para lograr unha estabilidade laboral e vital. Segundo explicou Miranda, na convocatoria de 2025 xa se recibiron 1.166 solicitudes de retornados procedentes de países como Cuba, O Reino Unido, A Arxentina, Suíza, O Brasil, Estados Unidos ou Venezuela.
O prazo para solicitar estas axudas extraordinarias permanecerá aberto ata o 30 de setembro. Por iso, Miranda animou ás familias galegas do exterior interesadas a tramitar a súa solicitude canto antes. Tamén convidou ás persoas que xa regresaron a achegarse ás oficinas de retorno para recibir información e completar os trámites necesarios.
O compromiso da Xunta, asegurou o secretario xeral, é seguir reforzando este apoio para que ningunha familia que desexe volver quede atrás.
