Desde UCIN Boiro compartiron un comunicado no que a agrupación mostra o seu “apoio total” ás familias, profesorado e ANPA do CEIP Praia Xardín, que levan semanas denunciando a falta de recursos no centro para atender de maneira axeitada ao alumnado con necesidades educativas especiais (NEE). UCIN sinala que “a ausencia de profesorado especialista en Pedagoxía Terapéutica (PT), Audición e Linguaxe (AL) e dun segundo coidador fixo está a provocar unha situación de precariedade que compromete a igualdade de oportunidades, a seguridade e a integración real do alumnado”.
Ante esta situación, UCIN Boiro solicita á Consellería de Educación da Xunta de Galicia a incorporación inmediata de profesorado especialista en PT e AL, así como a asignación dun segundo coidador fixo que garanta a seguridade e autonomía dos nenos e nenas con maiores necesidades. Ao mesmo tempo, engaden, “reclamamos un compromiso firme e estábel que asegure recursos suficientes no futuro, evitando que esta problemática volva repetirse nos próximos cursos”.
“A educación inclusiva é un dereito fundamental. Non se pode falar de calidade educativa sen garantir a atención adecuada a todos os alumnos e alumnas. A Xunta debe actuar de inmediato”, sinalan desde UCIN Boiro, facendo un chamamento á Xunta de Galicia para que “escoite as demandas das familias e da comunidade educativa, e dea unha resposta urxente e responsábel a esta situación que afecta directamente o presente e ao futuro dos nosos estudantes”.
Así mesmo, UCIN Boiro informou que xa presentou un escrito formal ante a Consellería de Educación da Xunta de Galicia, no que se detallan estas demandas e solicítase unha resposta inmediata á problemática que vive o CEIP Praia Xardín.
