O Concello de Ribeira informa de que esta semana comezaron os traballos para realizar a instalación da rede de pluviais e máis o paviamentado no estacionamento público que hai diante do Matadoiro e do Punto Limpo, no Polígono Industrial de Xarás.
Fontes do Goberno local engadiron que “o acceso e aparcadoiro ao Punto Limpo e ao Matadoiro Municipal, tiña un firme de aglomerado asfáltico en moi mal estado, debido sobre todo a que, ao non dispor de rede de recollida de pluviais, as augas superficiais víñanse acumulando en zonas puntuais, provocando danos e disgregacións no firme”.
Para solucionalo o Concello de Ribeira vai investir preto de 120.000 euros na instalación dunha liña de pluviais formada por colectores de PVC e posteriormente pavimentar toda a explanada cunha nova superficie.
Segundo informa o alcalde, Luís Pérez Barral, o obxectivo fundamental que se persegue con este proxecto é o de mellorar o firme actual desta zona do Polígono Industrial de Xarás, que usan acotío
centos de persoas para estacionar os vehículos para ir ao traballo.
Para conseguir este obxectivo demoleranse os pavimentos por onde discorrerá a nova rede de pluviais con tubaxes de PVC, arquetas sumidoiro e pozos de rexistro con conexión á rede. O proxecto tamén contempla a construción dunha cuneta revestida de formigón no pé do noiro existente, o saneo da zona máis deteriorada da chaira, aplicarase saburra nas fochancas, a extensión dunha capa de mestura bituminosa en quente (6 cm de espesor) en toda a superficie e finalmente pintura viaria.
A obra foi adxudicada á empresa Canarga, S.L. por un valor total de 118.000 euros IVE incluído e conta con fondos de Habilitación e Mellora de Infraestruturas dos Parques Empresariais.
