O Partido Popular e o Partido Barbanza Independiente (PBBI) rexistraron no Concello de Ribeira unha moción de censura contra o actual alcalde, Luís Pérez Barral (BNG). A iniciativa, presentada en rolda de prensa, debaterase nos vindeiros días nun pleno extraordinario que deberá convocarse no prazo máximo de dez días hábiles.
O acordo, presentado polo voceiro do PBBI, Vicente Mariño, e pola voceira do PP, María Sampedro, propón como candidata á Alcaldía á propia Sampedro e compromete a ambas formacións a desenvolver “un proxecto sólido, eficiente e transparente” que conte coa participación social.
Segundo explican no escrito rexistrado, as principais razóns desta decisión son a “falta de consenso dentro do goberno municipal, a carencia de diálogo coa oposición, a falta de resposta a proxectos estratéxicos e o insuficiente control do gasto en áreas como Festexos”.
O actual executivo está formado por 5 concelleiros do BNG, 5 do PBBI e 1 do PSdeG-PSOE, mentres que o PP ocupa a oposición con 10 edís. A moción conta co apoio dos 10 concelleiros populares e de catro dos cinco do PBBI, xa que o edil Juan Luis Furones pasará ao Grupo Mixto. Desta forma, PP e PBBI suman 14 concelleiros de 21, garantindo a maioría absoluta no pleno.
Mariño subliña que a decisión “non é un ataque persoal” senón unha medida para “defender os principios e o modelo de funcionamento que consideramos máis beneficioso para Ribeira” tras “tentativas frustradas de reconducir a situación”. Pola súa banda, Sampedro afirma que con esta moción “comeza a Ribeira que merecemos” e critica ao actual rexedor por “non gobernar desde o diálogo nin o consenso”.
Se prospera a moción de censura, PP e PBBI comprométense a formar un goberno estable centrado na xestión dos servizos básicos, na recuperación de infraestruturas paralizadas e na captación de investimentos. A folla de ruta inclúe mellora dos servizos públicos, desenvolvemento económico e rural, protección social, igualdade de oportunidades e transparencia.
O novo executivo, sinalan, contará co respaldo de case o 60 % dos votos emitidos nas eleccións de 2023 —7.973 sufraxios fronte aos menos de 3.000 do BNG— e aspira a “recuperar a puxanza e o liderado” do municipio.
