Continúan activos tres focos de lume no barco de Ribeira, pero hai optimismo: “Non é necesario retirar o combustible”.
“Non hai tranquilidade ata o final, pero cada vez está mellor a situación”. Con estas palabras o presidente de Portos de Galicia, José Antonio Álvarez, resumía á TVG o estado do arrastreiro Awadi, que leva varios días ardendo no porto de Ribeira.
Aínda que no interior da embarcación permanecen tres focos de lume activos, o incendio atópase controlado. Os esforzos céntranse agora en achicar auga para reducir a escora e manter a flotabilidade do barco, unha tarefa que, segundo os técnicos, está a dar resultado. De feito, xa non é preciso o apoio dun arrastreiro para estabilizar a embarcación.
O operativo confirma que non será necesario retirar o combustible almacenado a bordo. En todo caso, e como medida preventiva, o buque continúa rodeado de barreiras anticontaminación para actuar de inmediato ante calquera posible vertedura.
O armador do Awadi colabora en todo momento cos traballos de seguridade, mentres que os equipos de emerxencia mostran un moderado optimismo sobre o desenlace. Todo apunta a que o barco poderá ser retirado da auga, aínda que o seu destino sexa directamente a despezamento como ferralla.
Tras varios días de actividade intensa no porto, as autoridades avanzan que o porto comercial de Ribeira podería reabrirse ao longo da xornada.
