A Policía Nacional deu por pechada a investigación da violenta liorta ocorrida en Ribeira o pasado 1 de xullo, tras visionar durante meses os vídeos gravados por cámaras de seguridade e por testemuñas co móbil. O obxectivo era identificar os participantes no enfrontamento entre dúas familias, os Bentos, de Santiago de Compostela, e os Borja, de Ribeira, durante unha pedida de man.
O conflito rematou co atropelo mortal do tío do noivo e outro familiar ferido moi grave por lesións de arma branca. Ese mesmo día, a Policía detivo seis persoas na peaxe da AP-9, á altura de Teo, todas da familia compostelá, entre elas o irmán do falecido, que permanece en prisión investigado por homicidio involuntario ao ser considerado autor do atropelo.
Días despois houbo seis novas detencións, nesta ocasión de membros da familia de Ribeira, residentes no poboado da Conlleira. Un deles ingresou no cárcere acusado de golpear cun machado un dos participantes na liorta.
As pescudas continuaron e nas últimas semanas a Policía arrestou tres persoas máis: dúas por participar activamente na agresión ao home que quedou gravemente ferido e outra por conducir un vehículo que levou por diante mobiliario do local onde se celebraba a festa.
Con estas últimas actuacións, a Policía suma 15 detidos e dá por concluída a investigación dunha pelexa mortal na que participaron preto dun cento de persoas.
