A Área de Cultura do Concello de Outes compartiu a axenda de Outes á Escena, a programación de espectáculos de artes escénicas que durante as fins de semana dos meses de setembro, outubro, novembro, decembro, xaneiro e febreiro, representaranse no auditorio da Casa da Cultural. Serán en total dezasete espectáculos teatrais para todos os públicos.
As entradas saíran á venda na plataforma habilitada 15 días antes da representación e o luns previo tamén estarán dispoñíbeis as reservadas para a venda presencial na Casa da Cultura.
Establécense dous bonos: o bono xeral (que dará acceso a todas as obras para adultos e ten un prezo de 30,80 €) e o bono miúdo (para as obras para o público infantil e familiar e cuxo prezo é de 14,70 €). Ámbolos dous poderán solicitarse a partir do luns 8 de setembro na Casa da Cultura.
O certame comezará o 27 de setembro ás 20.30 horas con As Desterradas, de Producións Teatrais Excéntricas, e proseguirá o 4 de outubro con As damas de Ferrol, de Teatro do Noroeste, a partir das 20.00 horas. Continuará o 11 de outubro con Tavole, de Zirko Txosko, ás 19 horas (público infantil e familiar) e con Zozobra (o 19 de outubro ás 20.00 horas, a cargo de Roca Producións). Outubro pechará con As Gardiás, de Teatro de Ningures, a partir das 20.00 horas. Podemos consultar a axenda enteira na web municipal do Concello de Outes.
