A troula prosegue este sábado 20 de setembro en Rianxo, logo das Festas da Guadalupe que rematan hoxe. En concreto, este sábado retomaranse as Festas de Taragoña e levarase a cabo o concerto que tivo que se aprazado no seu día. Actuarán a histórica banda rockeira da nosa comarca Heredeiros da Crus, o Grupo Euphoria e máis Disco Móbil Euphoria Show. A cita será a partir das 22.30 en Campo Maneiro (Taragoña) co concerto dos dos Heredeiros, estando prevista a actuación de Euphoria a partir da medianoite aproximadamente. Organiza a comisión veciñal de festas de Taragoña.
Heredeiros da Crus presentará as cancións do seu novo traballo discográfico, Trankimasin, xunto cos clásicos temas do seu repertorio. Nas súas palabras, Trankimasin é “unha colección de 12 comprimidos receitados en caso de deficiencia sanguínea de rock setenteiro e sempre baixo a estrita supervisión médica dos máis ghrandes”. Engaden que “a composición destas pastillas vai desde a irreverencia ata a retranca sempre mesturadas con alta dose de guitarras electrizantes e moitos miligramos do seu excipiente segredo: o ferro da base tractora demoledora dos Heredeiros”.
