A Asociación de Empresarios de Ribeira (AER) fixo balance da actividade xerada pola súa campaña Volta ao Cole, posta en marcha para dinamizar as vendas ao remate da tempada estival ao tempo que se recompensou a fidelidade polo comercio local e se botou unha man ás familias na costa arriba de setembro. En total rexistráronse 1.423 tíckets.
Este martes 23 de setembro celebrouse o sorteo da campaña, na que se puxeron en xogo vales de compra por valor de 500 euros e diversos lotes de material escolar.
“A iniciativa contou cunha excelente acollida, rexistrándose un total de 1.423 tíckets de compra”, explicou a directiva da AER.
“Desde a Asociación”, engadiron, “queremos agradecer sinceramente a todas as persoas que día a día elixen os comercios locais para realizar as súas compras. O seu apoio é fundamental para manter viva a economía de proximidade e contribuír ao desenvolvemento do noso tecido comercial”.
A campaña Volta ao Cole naceu co obxectivo de dinamizar as compras durante o regreso ás aulas e poñer en valor a importancia do comercio de proximidade. “Grazas á alta participación, consideramos que os obxectivos foron amplamente cumpridos”, sinalaron dende a patronal, engadindo que “para máis información sobre os gañadores e futuras campañas, animamos a seguir os nosos perfís nas redes sociais ou contactar cos establecementos adheridos”.
