O Grupo Municipal Socialista de Rianxo reafirma o seu compromiso coa creación dun Centro de Día 100% público, que garanta o acceso universal e de calidade ás persoas maiores e dependentes do municipio. A moción presentada no último pleno instaba á Xunta de Galicia á execución inmediata do proxecto e propoñía a creación dunha comisión de seguimento para asegurar a participación cidadá, a transparencia e a planificación conxunta.
Porén, a proposta non saíu adiante ao votar en contra REC e PP. A pesar do resultado, os socialistas ven esta situación como un punto de partida para reflexionar e consensuar o modelo de xestión. “É o momento de sentarse, dialogar e definir con claridade cal debe ser o modelo de servizo que queremos para Rianxo. O noso obxectivo non é confrontar, senón tender a man para construír xuntos un proxecto sólido, como estamos facendo coa residencia de maiores que a Deputación construirá no noso municipio”, sinalou o portavoz socialista, Óscar Rial.
Desde o PSOE subliñan que, mentres noutros concellos se están a promover proxectos con capital privado que supera os 800.000 euros, en Rianxo fálase dunha aportación municipal arredor de 170.000 euros sen ter claro aínda o modelo final de xestión. Esta situación reforza, segundo os socialistas, a necesidade dunha planificación clara e compartida, onde todas as forzas políticas e a cidadanía coñezan o custo final do servizo, o número de prazas, a súa distribución e o financiamento necesario.
Rial advertiu que se deben evitar casos como o da Biblioteca Municipal, que leva un ano sen uso por falta de planificación, ou a incerteza sobre o Pazo de Rianxiño, sen un destino definido. “A veciñanza merece certezas, transparencia e servizos públicos de calidade, non proxectos que xeren dúbidas ou división”, engadiu.
O PSOE insiste en que a súa proposta non pretendía só marcar unha posición política, senón abrir un proceso de participación e debate no que todas as opcións estivesen enriba da mesa antes de tomar decisións definitivas. “O noso compromiso é claro: defenderemos sempre un modelo público que garanta a igualdade de acceso e que non supoña unha carga económica para as familias. Pero tamén queremos escoitar, dialogar e buscar acordos que permitan sacar adiante un proxecto que sexa de todos e para todos. Agora é momento de que todas as forzas asumamos a nosa responsabilidade e traballemos xuntas para facer realidade este servizo esencial”, concluíu.
