O portal da Lista Vermella de Patrimonio que mantén e actualiza Hispania Nostra, co obxectivo de sensibilizar á poboación e ás administracións sobre a necesidade de coidar e poñer en valor os tesouros arquitectónicos, artísticos e culturais das dezasete Comunidades, incluíu na súa relación de bens ameazados (categoría de patrimonio civil, arquitectura vernácula) o pombal da reitoral de Santa María do Xobre, na Pobra do Caramiñal, que foi residencia da aristocracia eclesiástica en época barroca e foi reedificada no ano 1758 para incluír un patio de uso agrícola.
Trátase dun pombal de planta circular con corpo cilíndrico de cachotería enlucida e cuberta cónica de tella curva. Presenta unha cornixa saínte na parte inferior do tellado que serve de paso e soporte para que as pombas poidan chegar aos seus niños. Forma parte do conxunto da reitoral de Santa María do Xobre e está catalogado pola Xunta e no PXOM
Respecto do estado de conservación, “malia que todo o conxunto da reitoral ten deficiencias na súa conservación, o pombal é o elemento en peor estado. Nos últimos anos perdeu parte da estrutura do teito e atópase rodeado de maleza que se está incrustando na cachotería”, sinalan dende Hispania Nostra.
Localidade: A Pobra do Caramiñal
Data de inclusión: 09 setembro, 2025
Período histórico: Idade Moderna
Época: Séculos XVI-XVIII
