O Pleno da Corporación de Rois aprobou este venres o regulamento de réxime interno do Punto de Atención á Infancia (PAI) situado en Urdilde, con capacidade para 20 nenos e nenas de entre 3 meses e 3 anos, así como a ordenanza reguladora do prezo público do seu comedor. Ambos puntos saíron adiante cos votos a favor do PP e a abstención de PSdeG e BNG. A sesión comezou cun minuto de silencio polos crimes en Gaza e noutros conflitos armados, a proposta do alcalde Ramón Tojo.
O Concello mantén en proceso de licitación a xestión do PAI, que comezará a funcionar este mesmo ano. Para a primeira matrícula terán preferencia os nenos e nenas empadroados en Rois xunto cos seus pais ou nais, manténdose a prioridade durante todo o tempo de uso da praza. As familias non empadroadas quedan en grao 3 de prioridade, e o PAI contará ademais cunha praza de emerxencia social, ocupable por recomendación dos Servizos Sociais municipais.
O PAI funcionará de setembro a xullo, de 8.00 a 15.30 horas de luns a venres, salvo festivos, e contará con servizo de comedor, permanecendo pechado en agosto. Estará atendido por tres profesionais: dúas de atención educativa e unha persoa de apoio. O regulamento aprobado recolle as funcións do persoal, as normas de matrícula e admisión, así como as normas de alimentación e convivencia e os dereitos e obrigas das familias.
Durante o debate, os grupos da oposición consideraron que o PAI non debería pechar en agosto. O alcalde respondeu que se mantén o mesmo criterio de funcionamento que na escola infantil, que tamén pecha ese mes.
En canto ao prezo do comedor, a Corporación aprobou a ordenanza que regula o servizo conforme ao Decreto 49/2012 da Xunta, que fixa para o curso 2025-2026 tarifas entre a gratuidade e os 74,05 euros mensuais segundo a renda familiar, e 4,23 euros por día solto. O Concello establece bonificacións do 20 % para familias numerosas e monoparentais e para a segunda e sucesivas crianzas dunha mesma familia, así como exencións para rendas iguais ou inferiores aos 7.500 euros anuais a partir do segundo fillo e para familias acolledoras de menores con medidas administrativas de tutela ou garda.
Ambos puntos foron aprobados cos votos do PP e a abstención de PSdeG e BNG.
