O Auditorio Municipal de Ribeira acollerá neste trimestre tres actuacións promovidas pola Deputación da Coruña no marco do programa Outono das Artes, un programa que xurde como apoio á divulgación e promoción das diferentes formas de expresión artística presentes en Galicia. Este mércores 10 de setembro presentáronse as tres actuacións programadas para Ribeira nunha cita cos medios na que participaron a concelleira de Cultura, Antía Alberte, a concelleira de Educación, Cruz Rivadulla e o Dinamizador Cultural do concello, Unai González.
Alberte informou que dende a área de Cultura de Ribeira colaboramos con este programa provincial “para achegar algunhas das mellores propostas musicais do momento á nosa veciñanza e con entrada de balde”.
Anunciou tamén que a primeira das actuacións será o vindeiro sábado 20 de setembro, ás oito da tarde, con Uxía como protagonista. A artista galega achegará á veciñanza de Santa Uxía e da contorna o seu espectáculo Será por flores, co que conmemora os seus 40 anos na música. “É un espectáculo único e intimista, onde revisará os piares do seu percorrido musical e as súas raíces galegas, no que conxugará os temas máis emblemáticos do seu repertorio con outras creacións máis novas”, adiantou a concelleira, sinalando que a entrada será gratuíta ata encher a capacidade da sala e con apertura de portas para acceso do público dende media hora antes.
Xa no mes de novembro, aproveitando que é o mes no que se conmemora Santa Icía a patroa da música, teremos as outras dúas actuacións.
Por unha banda, o sábado 15 de novembro, tamén ás oito, conmemorarase o 25 aniversario dunha das mellores agrupacións de jazz de Galicia: Sumrrá. O trío ofrecerá un concerto especial por este aniversario e fará parada no Auditorio Municipal de Ribeira.
Na seguinte fin de semana, o sábado 22, será a quenda da Asociación Cultural Donaire, que tamén estará en Santa Uxía para celebrar o seu 25 aniversario, un fito importante co que conmemoran tantos anos de traballo incansábel na defensa e divulgación da cultura tradicional galega.
Para rematar a concelleira de Cultura salientou: “Temos un outono cargado de opcións culturais no noso Auditorio Municipal, xa que ás funcións da Mostra de Teatro, súmanse outras accións como a estrea teatral do 19 de setembro que presentamos onte e agora tamén estas tres actuacións musicais, polo que haberá propostas para todos os públicos e para todos os gustos ao longo destes meses”.
