O Dúo Simant, formado polo trompetista Rubén Simeó, de recoñecemento internacional, e o pianista Antonio Morant, catedrático de conservatorio, actuará este sábado, 6 de setembro, xunto coa Banda de Música de Noia. O concerto terá lugar no Liceo de Noia a partir das 22.00 horas e incluirá un repertorio variado, pensado para todos os públicos.
A presentación do evento celebrouse este mércores no Casino de Noia, nun acto no que participaron a concelleira de Cultura, Chelo Martínez, o presidente da Banda de Música, Efrén Rama Martínez, o director da agrupación, Martín Moares, e o presidente da Sociedade Liceo de Noia, Óscar Prego Boente.
Efrén Rama destacou a “gran calidade musical” do Dúo Simant e adiantou que o concerto contará cun programa “variado e con máis dunha sorpresa”. Pola súa banda, Martín Moares subliñou a ilusión coa que a Banda afronta esta oportunidade: “Non deixamos pasar unha ocasión de ensaio e estamos convencidos de que será un concerto fantástico. Agardamos tamén que contribúa a achegar máis xente á Banda e á Escola de Música que botaremos a andar no próximo mes en colaboración co Concello”.
O presidente do Liceo, Óscar Prego, puxo en valor a continuidade deste tipo de colaboracións culturais e a presenza de Rubén Simeó por segundo ano consecutivo: “Con boa disposición e colaboración podemos seguir mantendo en Noia unha cultura viva”.
Finalmente, a concelleira de Cultura, Chelo Martínez, destacou o papel fundamental destas dúas entidades no tecido cultural noiés: “A Banda de Música leva máis de cen anos dando vida á vila e o Liceo traballando pola cultura local desde hai case un século. O Concello só pode estar agradecido e ofrecer a súa total colaboración”.
