O xerente do Consorcio Galego de Servizos de Igualdade e Benestar, Perfecto Rodríguez, visitou hoxe a escola infantil de Rois para comprobar o resultado das obras de mellora realizadas na súa zona exterior. Na visita tamén participou o alcalde do municipio, Ramón Tojo.
O ente autonómico destinou preto de 16.000 euros á substitución do caucho existente no patio por pavimento continuo, unha actuación que incrementa a seguridade das crianzas ante posibles caídas. Os traballos foron contratados e executados polo propio Concello de Rois, mentres que o Consorcio asumiu o financiamento con cargo ás liquidacións pola prestación do servizo.
Esta intervención enmárcase no conxunto de actuacións de mellora que o Consorcio realiza durante o verán nas súas escolas infantís, co obxectivo de acondicionalas para o regreso ás aulas, previsto para este venres, 5 de setembro.
