O Concello da Pobra do Caramiñal mantén aberta a convocatoria do concurso para planificar a fachada marítima da vila ata o 23 de setembro, coa coordinación técnica da Fundación RIA, o apoio administrativo do COAG e o financiamento da Fundación Marta Ortega Pérez (MOP).
Reorganizar o espazo público, a mobilidade e o mercado semanal é o obxectivo central desta convocatoria, dotada con 33.000 € en premios e a adxudicación do plan director, valorado en 50.000 €.
Trala demanda expresada pola comunidade arquitectónica, o prazo inicial de presentación de propostas ampliouse a inicios do verán e permanecerá aberto ata o 23 de setembro ás 13.00 h (hora peninsular). Esta decisión do Concello da Pobra do Caramiñal responde á vontade de “favorecer a máxima participación e garantir que os equipos dispoñan do tempo necesario para desenvolver propostas de calidade, á altura do desafío urbano que se formula”.
Poñendo o foco na calidade do espazo público, a reorganización do mercado semanal e a ordenación da mobilidade, o ámbito de actuación deste concurso inclúe a zona portuaria, equipamentos públicos, espazos verdes e tramos da estrada AC-305.
O xurado estará integrado polos arquitectos Alfonso Salgado (Salgado e Liñares), Elizabeth Abalo (Abalo Alonso Arquitectos) e Marcial Rodríguez (RVR Arquitectos), así como por representantes do Concello da Pobra do Caramiñal e o Colexio de Enxeñeiros de Camiños, Canais e Portos de Galicia.
A convocatoria desenvólvese nunha única fase e baixo anonimato. Concederanse tres premios de 20.000 €, 8.000 € e 5.000 €, e a proposta gañadora asumirá a redacción do plan director mediante un contrato valorado en 50.000 €.
A convocatoria oficial do concurso está dispoñíbel na Plataforma de Contratación del Sector Público.
O concurso parte dunha diagnose realizada pola Fundación RIA en colaboración coa Axencia Galega de Infraestruturas (AXI), que puxo de manifesto as dificultades actuais derivadas do trazado da AC-305 e da localización do mercado semanal, así como o potencial dunha reconfiguración integral do ámbito. A reestruturación do tráfico, a redistribución dos postos do mercado e a mellora dos espazos libres serán eixes centrais das propostas, sinalan as entidades impulsoras do proxecto, engadindo que a proposta gañadora recibirá o encargo do plan director e marcará a folla de ruta para futuras intervencións urbanas na Pobra do Caramiñal. A convocatoria permitirá tamén distinguir outras ideas destacadas mediante premios e mencións. O anuncio oficial do concurso publicarase nas próximas semanas a través das canles habituais do Concello e das entidades colaboradoras.
