O Goberno local de Noia anunciou a reapertura da Oficina Municipal de Información ao Consumidor (OMIC), un servizo que permanecera inactivo durante os últimos cinco anos e que volverá a estar dispoñible grazas á reorganización impulsada polo novo executivo municipal.
A partir desta semana, a cidadanía poderá recibir atención personalizada para consultas, reclamacións e denuncias ante o Instituto Galego de Consumo.
Ubicación: 1º andar da Casa do Concello
Horario de atención ao público: luns e venres, de 9:00 a 13:00 horas
O alcalde Fran Pérez salientou que a reapertura supón “recuperar un servizo fundamental que Noia levaba demasiado tempo sen ter, e que permite ofrecer á veciñanza unha canle directa de defensa dos seus dereitos como persoas consumidoras”.
Con esta medida, o Goberno local reforza o seu compromiso cunha administración máis próxima, accesible e centrada nas necesidades da cidadanía.
