O Concello de Muros compartiu os detalles do programa de subvencións destinadas a entidades sen ánimo de lucro para a realización de actividades culturais durante o ano 2025. As axudas teñen o prazo aberto até o 21 de setembro, segundo confirmaron dende o Consistorio, que engadiron que as bases e os modelos normalizados están dispoñíbeis na sede electrónica municipal.
As subvencións van dirixidas a apoiar programas e actividades culturais no concello, de promoción e cooperación, de difusión e animación e de espallamento da cultura galega. As beneficiarias serán entidades inscritas no Rexistro de Asociacións de Galicia con sede en Muros e que desenvolvan as súas actividades no municipio. Achegaranse até 1.500 euros por proxecto. O total dispoñíbel é de 11.000 euros.
