O alcalde de Ribeira, Luís Pérez Barral (BNG), anunciou esta mañá o cesamento de tres dos catro concelleiros do PBBI que asinaron a moción de censura xunto co PP. Trátase de Vicente Mariño de Bricio, Herminia Pouso e Fernando Abraldes, cuxas competencias serán asumidas polo propio rexedor ata a celebración do pleno previsto para o 13 de outubro.
A cuarta edil independente, Tania Redondo, manterase no goberno local. Pérez Barral xustificou a súa decisión en que Redondo “acabou asinando mediante moitas presións, coaccionada polos cabecillas da moción”, polo que non a considera responsable da ruptura do tripartito.
O rexedor nacionalista compareceu no salón de actos da lonxa de Ribeira, arroupado polos membros do seu grupo municipal e por cargos do BNG na comarca. Alí denunciou que o acordo entre populares e independentes responde a unha “operación oscurantista que non amosa os motivos reais da moción de censura” e instou aos promotores a dar explicacións á veciñanza.
Pérez Barral lembrou que en 2023 os mesmos edís do PBBI denunciaron presións e mesmo supostos intentos de suborno por parte de militantes do PP para impedir o seu pacto co BNG. “Deberán explicar se agora esas presións deron resultado”, advertiu.
O alcalde atribuíu a operación a unha estratexia “orquestrada polo PP en connivencia coa Xunta” e vinculouna co que considera un “boicot histórico” a Ribeira desde Santiago. Citou como exemplos os conflitos co ente Portos polas festas de verán, a falta de financiamento do novo polígono industrial, o bloqueo da residencia de maiores e os recortes en educación e sanidade. “Por non sucumbir a eses recortes, hoxe fáiseme esta moción de censura”, afirmou.
Aínda que o BNG dá por feito que a moción prosperará —cos 10 votos do PP e tres do PBBI, fronte aos 11 necesarios—, Pérez Barral proclamou que nin el nin o Bloque se van render. Reivindicou a súa xestión, salientando investimentos de máis de 5,5 millóns de euros nas parroquias, e asegurou que o seu goberno pode saír “coa cabeza ben alta”.
O tripartito en funcións estaba integrado por cinco edís do BNG, cinco do PBBI e un do PSOE. Se a moción sae adiante, a popular María Sampedro converterase na nova alcaldesa, ao fronte dun executivo do PP no que tamén se integrarán tres concelleiros independentes. O futuro de Tania Redondo permanece aberto.
