A presenza de toxinas nas rías galegas mantense practicamente sen cambios, segundo os últimos datos facilitados polo Intecmar (Instituto Tecnolóxico para o Control do Medio Mariño). A semana comezará coa mesma situación coa que rematou: o 73 % dos polígonos de mexillón permanecen pechados.
“Estamos nunha situación na que hai tres cuartas partes das zonas pechadas por toxina, practicamente toda lipofílica; algo de PSP, pero a principal é lipofílica. É unha situación, nesta época do ano, bastante habitual. Se acaso, este ano foi raro que en xullo estivera case todo aberto, cando normalmente hai polígonos pechados”, explicou o subdirector do Intecmar, José Molares.
As últimas análises deixan dúas novidades: o luns pecharase unha zona de marisqueo na ría de Muros e, pola contra, abrirase outra na ría de Aldán, ata agora afectada por toxina amnésica.
No tocante aos polígonos de mexillón, só permanecen abertos os da ría de Ares-Betanzos e os das zonas máis interiores da ría de Arousa. Ademais, este venres tamén se levantou o peche cautelar na parte interna da ría de Vigo, decretado pola presenza de toxina paralizante.
