O Concello de Muros reforza neste inicio de curso 2025/26 o Servizo Municipal de Madrugadores nos centros educativos da localidade, un programa gratuíto financiado integramente polo consistorio co obxectivo de facilitar a conciliación das familias.
Neste arranque escolar están inscritos 62 nenos e nenas pertencentes a 45 familias: 17 no CEIP Plurilingüe de Louro (11 familias), 33 no CEIP Plurilingüe Ricardo Tobío (24 familias) e 12 no CEIP Ramón de Artaza y Malvárez (10 familias).
“É unha satisfacción ver que esta medida para impulsar a conciliación se consolida”, afirmou a alcaldesa, María Lago, quen subliñou que este recurso municipal contribúe tamén a fixar poboación en Muros.
Pola súa banda, a concelleira de Ensino, Laura Rivadeneira, destacou que despois da primeira experiencia dun curso completo con xestión municipal, nas últimas semanas o Concello consensuou cos centros e as familias usuarias os novos detalles do servizo, para mellorar a súa eficacia e garantir que “ninguén quede fóra”.
Tamén a concelleira de Igualdade, Maruxa Martínez, puxo en valor a iniciativa: “A conciliación é moi necesaria para dar pasos cara á igualdade, por iso é tan importante este servizo gratuíto de Madrugadores”.
O Concello celebrará esta semana reunións coas familias usuarias para abordar o funcionamento do servizo. Terán lugar mañá, xoves 4 de setembro, ás 18.00 horas no CEIP de Louro e ás 19.30 horas no CEIP Ramón de Artaza; e o venres 5, ás 18.00 horas, no CEIP Ricardo Tobío.
