O concelleiro de Medio Ambiente de Porto do Son, Juan José Calo Miranda, participou o pasado mércores, 27 de agosto, na xornada de restauración de fondos mariños, organizada pola asociación inclusiva da nosa comarca, Amicos.
A través desta iniciativa, pioneira en conservación mariña, visitaron o Laboratorio de Cultivo de Microalgas de Amicos, onde o persoal explicou polo miúdo como sementan os gametófitos destas algas pardas, que logo son reinseridas nos arredores de Sálvora.
Unha vez reinseridas, convértense en bosques de kelp, vitais como hábitat de biodiversidade mariña, protectoras dos fondos mariños e para combater o cambio climático.
Na xornada tamén participaron a deputada responsábel de Industria, Emprego, Política Demográfica e Medio Ambiente da Deputación da Coruña, Rosa Ana García, o concelleiro de Política Social de Boiro, Raúl Treus e o concelleiro do Mar de Ribeira, Fernando Abraldes.
O obxectivo da saída foi coñecer de primeira man as accións medioambientais de restauración de fondos mariños levados a cabo pola entidade no marco de distintos proxectos de protección e conservación da natureza, neste caso encadrados no hub Blue Mission de océanos e ríos.
A cita comezou no Centro de Atención Integral de Amicos, onde as activistas medioambientais do dual Natura II lles ensinaron ao grupo o Laboratorio de cultivo de macroalgas. Alí cultivan as laminarias, algas pardas que chegan ao centro como gametófitos e que posteriormente son devoltas ao mar cando cumpren as condicións óptimas para a súa devolución ao mar.
Se ben as gorgonias que quedan atrapadas nas redes dos pescadores e que son entregadas ao equipo de Amicos son rehabilitadas no Hospital de Corais de Ribeira, os representantes institucionais tamén coñeceron en que consiste o proceso de recuperación destes corais, vitais para a biodiversidade mariña.
Trala explicación, o grupo dirixiuse a Aguiño, onde embarcaron para soltar un total de 110 laminarias e 4 gorgonias, da man da Confraría de Pescadores de Carreira-Aguiño, colaboradores da entidade neste tipo de accións medioambientais.
